XAÇMAZDA MEŞƏ YANĞINLARI NƏZARƏTƏ GÖTÜRÜLÜB

Bir neçə gündür Xaçmaz rayonunda baş vermiş meşə yanğının qarşısının alınması istiqamətində işlər görülür. Xaçmaz rayonunun Müzəffəroba kəndi yaxınlığında meşəlik ərazidə baş vermiş yanğını Fövqəladə Hallar Nazirliyi tərəfindən görülmüş zəruri və təxirəsalınmaz tədbirlər, qüvvələrin koordinasiyalı və effektiv tətbiqi sayəsində nəzarətə götürmək mümkün olub. Hazırda ətraf ərazilər, o cümlədən ictimai-iaşə və kommunikasiya obyektləri üçün təhlükə yoxdur. Yanğının tam söndürülməsi istiqamətində tədbirlər davam etdirilir. Onu da xatırladaq ki, Fövqəladə Hallar, Daxili İşlər, Ekologiya və Təbii Sərvətlər nazirliklərinin əməkdaşları, yanğının söndürülməsinə səfərbər olublar. Əraziyə yerli icra hakimiyyətinin müvafiq texnikaları da cəlb olunub.