RAMAZANDA ŞƏKƏRBURA VƏ PAXLAVANI BU SAATDA YEMƏK OLMAZ !!!

Ramazan ayında düzgün qidalanma uzunmüddətli aclıqdan sonra orqanizmin ehtiyaclarını balanslı şəkildə qarşılamaq baxımından böyük önəm daşıyır. Dietoloq-terapevt Nil Şahin Gürhan oruc tutanların qidalanmasında hər zamankindən daha çox əhəmiyyət verməsi lazım olduğuna diqqət çəkib. O bildirib ki, iftar və səhər süfrələrinizi balanslı qurun, bol-bol su için, iftar sonrası mütləq qısa gəzintiyə çıxmanız vacibdir. Dietoloq gün ərzində orqanizmi tox tutan yeməkləri sadalayıb: “Bu qidaların sırasına daxildir: kəpəkli yulaf, yumurta, kəpək çörəyi və bəzi çeşid sıyıqlar. İnsanlar bu qidalardan istifadə etsələr, gün ərzində özlərini daha enerjili hiss edəcəklər. Yorğunluq, halsızlıq kimi istənməyən hallar aradan qalxacaq. Bundan əlavə, rasionda mütləq qaydada, yağ qrupundan hansısa bir çeşid olmalıdır. Bu ya zeytun, ya da qoz ola bilər”. İftarda əsas yeməkdən öncə duru xörəyin olmasını ən vacib şərt hesab edən Nil Şahin Gürhan deyir ki, qızardılmış qidalardan mümkün qədər qaçmaq lazımdır. İftar zamanı normadan artıq və fasiləsiz qida qəbul etmək ziyandır. Hətta gecədən səhər saatlarına kimi yeyənlər də var. Bu, tibbi baxımdan düzgün sayılmır. Bu il Ramazan ayı Novruz bayramı ilə eyni vaxta təsadüf edib. Məlumdur ki, bu bayramda çoxlu şirniyyat, fərqli çeşiddə yeməklər hazırlanır. Mütəxəssislər bu günlərdə qidalanmaya xüsusi diqqət ayırmağın vacibliyini vurğulayır. Mütəxəssislər oruc tutanların, xüsusilə imsaqda şirniyyat qəbul etməsinin tövsiyə olunmadığını bildirib: “Oruc tutan insanlar yaxşı olar ki, imsaqda şirniyyat yeməsinlər. Şəkərbura, paxlava kimi şirniyyatları iftardan sonra istifadə etmək olar. Əgər səhər imsaqda şirniyyat yesələr, sonra gün ərzində qan şəkərinin dalğalanması nəticəsində özlərini halsız, yorğun hiss edəcəklər. İftarda sürətli yemək də ziyandır. Belə ki, bu cür yemək başda mədə problemləri olmaqla qan şəkəri və təzyiqin yüksəlməsinə səbəb olur. Uzun müddət ac qalan mədəni qəfildən yükləməmək, kiçik hissələri yaxşıca çeynəmək şərti ilə yavaş-yavaş və uzun müddət yemək tövsiyə edilir. Yatmazdan əvvəl yaxşı olar ki, qatıq yeyəsiz. Bu, bədəndə mayenin saxlanmasını tənzimləyir. Dietoloq-terapevt Nil Şahin Gürhan bildirir ki, oruc tutanlar yuxu rejiminə də düzgün əməl etməlidirlər.