QUBADA “ŞİMAL QARTALI” KİTABININ TƏQDİMATI KEÇİRİLİB

Quba Rayon Mərkəzləşdirilmiş Kitabxana Sisteminin oxu zalında Azərbaycan Yazıçılar Birliyi Quba bölməsinin 2022-ci ilin ədəbi fəaliyyətinin yekunlarına və Azərbaycan Yazıçılar Birliyinin üzvü Zülfüqar Qalaxudatlının Vətən müharibəsi qəhrəmanı Mehrab Niftəliyevə həsr etdiyi “Şimal Qartalı” və digər kitablarının təqdimatı keçirilib. AYB Quba bölməsinin və bölgədə fəaliyyət göstərən ədəbi məclislərin üzvlərinin iştirakı ilə keçirilən tədbirdə igid qəhrəman Mehrab Niftəliyevin valideynləri də iştirak ediblər. AYB Quba bölməsinin sədri, Əhməd Cavad, Ziya Paşa mükafatları laureatı şair Ramiz Qusarçaylı giriş sözü ilə tədbiri açıq elan etdikdən sonra ümummilli lider Heydər Əliyevin, şəhidlərimizin və ötən həftə dünyasını dəyişən AYB və “Ay işığı” ədəbi məclisinin üzvü şairə Zərifənin xatirəsi bir dəqiqəlik sükutla yad edildi. Yazıçı, şair, dramaturq Zülfüqar Qalaxudatlının 13 kitabdan sonra işıq üzü görən “Şimal Qartalı” kitabında Cəbrayıl, Qubadlı, Ağdam, Zəngilan, Xocavənd, Hadrut, Murovdağ və Şuşa döyüşlərində Mehrab və başqa qəhrəman oğullarımızın fədakarlıqlarından bəhs edən real hadisələr qələmə alınıb. Qəhrəman şəhid Mehrab Niftəliyevin valideyinləri AYB Quba bölməsinə, müəllifə və tədbir iştirakçılarına təşəkkürlərini bildirdilər.