QUBADA “QƏLƏBƏNİ YAŞADAN QƏHRƏMANLAR” QISAMETRAJLI FİLMLƏRİN TƏQDİMATI KEÇİRİLİB

Quba Rayon İcra Hakimiyyətinin təşkilatçılığı ilə şəhər 2 saylı təbiət fənləri üzrə məktəb-liseydə Azərbaycan Respublikasının Gənclər və İdman Nazirliyinin maliyyə dəstəyi ilə “Bakı Gənclər Klubu” İctimai Birliyi tərəfindən ərsəyə gətirilən “Qələbəni yaşadan qəhrəmanlar” qısametrajlı filmlərin təqdimatı keçirilib. Tədbirdə Quba Rayon İcra Hakimiyyəti başçısının birinci müavini Tariyel İbrahimov, Rayon İcra Hakimiyyətinin məsul şəxsləri, “Bakı Gənclər Klubu” İctimai Birliyini sədri, şəhid ailələri, qazilər, müharibə iştirakçıları, gənclər və məktəblilər, habelə ictimaiyyət nümayəndələri iştirak edib. Çıxış edənlər şəhidlərimizin əziz xatirələrinə dərin ehtiramlarını bildirmiş, ölkə Prezidenti, Müzəffər Ali Baş Komandan cənab İlham Əliyevin rəhbərliyi ilə şanlı ordumuzun əsgər və zabitlərinin göstərdiyi qəhrəmanlıqlardan danışmışlar. Qeyd edək ki, “Qələbəni yaşadan qəhrəmanlar” qısametrajlı filmlərin çəkilişi Fizuli və Quba rayonlarında aparılıb. Filmlərdə rayonumuzdan olan 3-cü dərəcəli Vətən Müharibəsi əlilləri Ağasıyev Taryel Bəxtiyar oğlunun, Dənyalov Zöhrab Eldar oğlunun və Şıxverdiyev Taleh Rahid oğlunun keçdiyi döyüş yolu işıqlandırılıb.