QUBADA ŞƏHİDİN ANIM TƏDBİRİ KEÇİRİLDİ

ADPU-nun Quba filialında Azərbaycan Silahlı Qüvvələrinin Xüsusi təyinatlı kəşfiyyatçısı, Vətən müharibəsi Şəhidi Seymur Mahir oğlu Qocayevin xatirəsinə həsr olunan “Qanı ilə tarix yazan qəhrəman: Şuşa fatehi Seymur Qocayev” mövzusunda hərbi-vətənpərvərlik tədbiri keçirilib. Tədbirdə şəhid ailələri, qazilər,rayon icra hakimiyyətinin məsul şəxsləri,filialın professor-müəllim və tələbə heyəti iştirak edib. Əvvəlcə Azərbaycan Respublikasının dövlət himni səsləndirilib. Ardınca Xalqımızın ümummilli lideri Heydər Əliyevin və Azərbaycanın ərazi bütövlüyü uğrunda mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad edilib. Sonra Müzəffər Ali Baş Komandan İlham Əliyevin Azərbaycan Silahlı Qüvvələrinin Xüsusi təyinatlıları qarşısındakı nitqindən ibarət videomaterial nümayiş olunub. Filialın direktoru dosent Yusif Alıyev tədbirin açılışındakı nitqində ümummilli lider Heydər Əliyevin dövlətçilik ideyalarından və Müzəffər Ali Baş Komandan, Prezident İlham Əliyevin liderliyi ilə Azərbaycanın çoxşaxəli inkişaf strategiyasından bəhs edib. Tədbirin aparıcısı, Heydər Əliyev Lektoriyasının müdiri Nəhayət Şirinova şəhid Seymur Qocayevin qısa və mənalı, lakin şərəfli və həmişəyaşar həyat yolu haqqında geniş açıqlama ilə çıxış edib. Tədbirdə çıxış edənlər Prezident İlham Əliyevin şəhid ailələrinə diqqət və qayğısından bəhs edərək, bu ənənənin rayonumuzda da geniş şəkildə davam etdirildiyini vurğulayıblar. Azərbaycanın şanlı və tarixi zəfərinin ayrı-ayrı istiqamətlərindən söz açıblar. Qeyd edilib ki, Azərbaycanın müstəqilliyinin qazanılması, qorunması, inkişafı, həmçinin ərazi bütövlüyü və suverenliyimızın təmin olunması məhz şəhadət zirvəsində olan qəhrəman oğullarımız sayəsində əldə olunub. Çıxışlardan sonra Şəhid Seymur Qocayevin həyatından bəhs edilən filmin nümayişi olub. Şəhid Seymur Qocayevin anası - Rəsmiyə Qocayeva çıxış edərək, oğlunun keçdiyi qəhrəmanlıq dolu həyat yolundan qürurla bəhs edərək tədbir iştirakçılarına öz minnətdarlığını bildirdi. Tədbirin bədii hissəsində filial tələbələri şəhidlərimizə həsr edilən şerlər səsləndirdilər. Sonda xatirə şəkli çəkdirildi.