QUBADA YUNUS EMRE İNSTİTUTUNUN TƏŞKİLATI DƏSTƏYİ İLƏ ƏNƏNƏVİ TÜRK OXÇULUĞU KURSLARI AÇILIB

Qubada Yunus Emre insitutunun təşkilati dəstəyi ilə yeniyetmə və gənclər üçün Ənənəvi Türk Oxçuluğu kursları açılıb. Məlumat üçün bildirək ki,Şimal bölgəsində yaşayan 9-18 yaş arası yeniyetmə və gənclər 3 aylıq Ənənəvi Türk Oxçuluğu kurslarında iştirak edirlər. Yunus Əmrə İnstitutunun və Okçular Vakfının 2017-ci ildən gerçəkləşdirdiyi “Kemankeş” layihəsi çərçivəsində keçirilən 8-ci Gələnəksəl Türk Oxçuluğu müəllimi təlimi proqramına qatılan “Çölçü” Birliyi qurucusu Eltən Törəçi proqramı uğurla başa vuraraq gələnəksəl Türk oxçuluğu müəllimi sertifikatı alıb. Dərslər peşakar Türk oxçuluğu müəllimi Eltən Törəçi tərəfindən həftədə 2 dəfə olmaqla 120 dəqiqə təşkil edir. Qeyd edək ki, kursu bitirən iştirakçılara “Çölçü” Birliyi tərəfindən sertifikatlar təqdim ediləcək. Bundan əlavə, Ənənəvi Türk Oxçuluğu kurslarını bitirənlər Azərbaycanda və xaricdə keçiriləcək ənənəvi oxçuluq festivallarında da iştirak edə bilmək şansı qazanırlar. Qeyd edək ki, Türk oxçuluğunun uşaqların fiziki və əqli inkişafı üçün çox böyük faydaları var. Belə ki, Uşaqlar gündəlik həyatlarında kürək və bel əzələlərini inkişaf etdirmirlər. Daha çox önə əyilərək iş gördükləri üçün onlarda duruş yalnışlıqları yaranır. Oxçuluq bütün bədəni, xüsusən də bel və qol əzələlərini məşq etdirməklə uşaqlarda duruş yalnışlıqlarını aradan qaldırmağa kömək edir. Oxçuluq hərəkətsiz bir idman növü kimi görünsə də, əslində bütün bədən əzələlərini inkişaf etdirən və gücləndirən bir idman növüdür. Bu idmanla mütəmadi məşğul olan uşaqların əzələləri güclü olur ki, bu da onlarda özünə inamı artırır. Bundan başqa müasir uşaqlarda tez-tez rast gəlinən diqqət çatışmazlığının müalicəsində də oxçuluğun faydası çox böyükdür. Ox atarkən diqqəti cəmləmək lazım olduğundan uşağın konsentrasiyası artır. Beləliklə, bu idman növü diqqət çatışmazlığı pozğunluğu olan uşaqlara da müsbət təsir göstərir. Odur ki, əziz valideyinlər uşaqlarınızın daha sağlam və əqli cəhətdən daha yaxşı inkişaf etməsini istəyirsizsə, bu fürsəti boşa verməyin.