QİAD SAHİBKARLARI "SƏHƏR YEMƏYİ"NƏ TOPLADI

Quba İş Adamlarına Dəstək platformasının təşkilatçılığı ilə Qubada sahibkarlar "Səhər Yeməyi" proqramında bir araya gəliblər. Tədbirdə Quba Rayon İcra Hakimiyyətinin rəsmisi, Quba KOB Dostu, Quba ABAD Factory İstehsalat Birliyinin direktoru, QİAD İdarə Heyətinin sədri, İdarə Heyəti üzvləri və bölgə sahibkarları iştirak edib. 50 sahibkarın iştirakı ilə keçirilən tədbirin məqsədi bölgədə fəaliyyət göstərən sahibkarlar arasında əlaqələrin sıxlaşdırılması, şirkətlərarası ticarətin inkişafı, dövlət-özəl dialoqunun artırılması və dayanıqlı tərəqqinin dəstəklənməsidir. Görüş fərqli sektorlarda fəaliyyət göstərən sahibkarlar arasında ikili görüşlərlə davam edib. Çıxış edənlər bildirdilər ki, Quba İş Adamlarına Dəstək platforması 2025-ci il üçün nəzərdə tutulan fəaliyyət planına əsasən il ərzində bu qəbildən olan görüşləri davam etdirməyi və sosial-iqtisadi sahədə əhəmiyyətli layihələrə imza atmağı hədəfləyir. Azərbaycanın bütün bölgələrində olduğu kimi, şimal regionunda da yaranmış münbit iqtisadi mühit, dövlət dəstəyi sahibkarlığın daha da inkişaf etməsinə öz töhfəsini verəcəkdir. QİAD platformasının üzvlərinin təşəbbüsü bu istiqamətdə dövlətimizin siyasətini dəstələyərək sahibkarlarımıza, nəticədə ölkə iqtisadiyyatına öz mümkün töhfəsini verməkdir.