QİAD PLATFORMASI ŞƏHİDLƏRİN XATİRƏSİNƏ İFTAR SÜFRƏSİ AÇDI

Quba İş Adamlarına Dəstək- QİAD platformasının təşkilatçılığı ilə Qubada müqəddəs Ramazan ayı ilə əlaqədar olaraq iftar süfrəsi təşkil olunub. Tədbirdə QİAD platformasının İdarə Heyətinin sədri və üzvləri, Quba Rayon İcra Hakimiyyətinin məsul şəxsləri, Quba Rayon Bələdiyyəsinin sədri, şəhid ailələri və qazilər, habelə media nümayəndələri iştirak ediblər.Həmrəyliyimizin daha da möhkəmləndirilməsi məqsədilə keçirilən mərasim Dövlət Himninin səsləndirilməsi və Vətən uğrunda canlarını qurban verən şəhidlərin əziz xatirəsinin bir dəqiqəlik sükutla yad edilməsi ilə başlayıb. Sonra QİAD İdarə Heyətinin sədri Cabbar Heybətov giriş nitqi söyləyərək mərasim iştirakçılarını müqəddəs Ramazan ayı münasibətilə təbrik edib. Mərasimdə din xadimləri tərəfindən müqəddəs "Quran-i Kərim"dən surələr oxunub, xalqımızın və dövlətimizin firavanlığı, əmin-amanlığı üçün dualar edilib. İftar süfrəsində Ramazan ayının fəzilətləri barədə söhbət edilib, bu ayın insanlar arasında mənəvi saflığın tərənnümçüsü olduğu qeyd olunub. Şəhid ailələri və qazilər onlara göstərilən diqqət və qayğıya görə Ölkə Rəhbərliyinə öz minnətdarlıqlarını bildirdilər. Qeyd edək ki, İnsanlar arasında həmrəyliyin və dini-mənəvi birliyin möhkəmləndirilməsinə xidmət edən mübarək Ramazan günlərində belə iftar süfrələrinin təşkil edilməsi cəmiyyətimizin vahidliyinə, ümumi amallar naminə ölkəmizdə dövlət-din arasında sıx birliyin olduğuna bariz nümunədir.