PEZEŞKİAN:“AZƏRBAYCAN BİZİM QOHUMUMUZ VƏ DOĞMAMIZDIR”

İran prezidenti Məsud Pezeşkian “Hökumət həftəsi” çərçivəsində etdiyi çıxışda son bir ayda Azərbaycan Respublikası ilə bağlı söylədiklərinə görə ona yönələn ittihamlara qətiyyətli bir şəkildə cavab verib. Pezeşkian deyib: “İndi biri çıxıb bir mediada soruşur: “Kim deyib ki, onlar bizim qardaşlarımızdır?” Mən deyirəm ki, onlar bizim qardaşlarımızdır!” O, çıxışının davamında vurğulayıb: “Əslində bizim suyumuz, torpağımız bir olub. İndi arada sərhəd çəkilib. Necə ki, məhəllədəki qonşuların hərəsinin öz evi var, hərə də öz evinin sahibidir. Amma biz bir-birimizlə qardaşıq, qohumuq”. Xatırladaq ki, iyul ayının sonunda Məsud Pezeşkian Zəncana səfəri zamanı İran-Azərbaycan münasibətləri barədə geniş reaksiyalar doğuran açıqlama verib. “Azərbaycan bizim qohumumuz və doğmamızdır” – deyən İran prezidenti Azərbaycanla münasibətlərin lazımi səviyyədə olmamasında İran tərəfinin məsuliyyət daşıdığını vurğulayaraq bildirib: “Bizim problemimiz nədədir ki, öz bacı-qardaşlarımızla dostcasına və sağlam əlaqə qura bilməmişik? Günahkar bizik, onlarda təqsir yoxdur”. Pezeşkianın bu açıqlaması İrandakı anti-Azərbaycan dairələrin və paniranist cərəyanın ciddi narahatlığına səbəb olub, onlar son həftələr ərzində Pezeşkianın əleyhinə çoxsaylı yazılar yazıb, çıxışlar ediblər, hətta həmin açıqlamadan sonra bəziləri Azərbaycan Respublikasından danışarkən kinayə ilə “Pezeşkiyanın qohumları” ifadəsini işlədiblər. Bu işdə ötən ilki prezident seçkilərində Pezeşkianın rəqibi olmuş Səid Cəliliyə yaxın şəxslər, o cümlədən Cəlilini dəstəkləyən “Sabitlik Cəbhəsi” təşkilatına mənsub siyasətçilər xüsusi canfəşanlıq göstəriblər. Pan İranist dairələr Məsud Pezeşkiana qarşı əsasən üç ittiham irəli sürürlər. Azərbaycan respublikasına qardaşlıq münasibəti, 12 günlük müharibədə Azərbaycanın guya İrana qarşı İsrailə yardım etməsini qəbul etməmək və Zəngəzur dəhlizinə qarşı kəskin mövqe nümaiş etdirməmək. Bu iddiaların son ikisinə ötən həftə İran Ali Milli Təhlükəsizlik Şurasının katibi Əli Laricani ölkənin ali rəhbərinin rəsmi saytına verdiyi geniş müsahibədə aydınlıq gətirib. O, İran İsrail müharibəsində Azərbaycanın hər hansı şəkildə iştirakına dair heç bir sübutun olmadığını vuröulayaraq deyib: “Bəziləri bir sıra sözlər danışır. Amma danışanlar bizə dəqiq sübutlar təqdim etməlidirlər. Hələlik əlimizdə heç bir sübut yoxdur. Azərbaycan hökuməti açıq şəkildə deyir ki, belə bir şey olmayıb. Bizim də masaya qoymaq üçün heç bir sübutumuz yoxdur. Azərbaycan müsəlman qonşumuzdur və mədəni bağlar baxımından bizə çox yaxın və dost ölkədir.Həmin müsahibədə Zəngəzur dəhlizi ilə bağlı sualı da cavablandıran Laricani onun özlüyündə İran üçün təhdid olmadığını bildirib.” Əslində Məsud Pezeşkiana qarşı hücumları, onun Azərbaycana qardaşlıq münasibət bəsləməsi ilə əlaqədardır.