MÜSİAD AZƏRBAYCAN ŞABRANDA İFTAR SÜFRƏSİ AÇDI

MÜSİAD Azərbaycan İctimai Birliyinin tərəfindən Müqəddəs Ramazan ayı münasibətilə Şabran rayonunda şəhid ailələri, qazilər və rayonda yaşayan Axısqa türkləri üçün iftar süfrəsi təşkil edilib. Proqramda Türkiyə Respublikasının Azərbaycandakı fövqəladə və səlahiyyətli səfiri Birol Akgün, Şabran Rayon İcra Hakimiyyətinin başçısı Asif Hüseynov, digər rəsmi qonaqlar və MÜSİAD Azərbaycan İctimai Birliyinin idarə heyətinin sədri Rəşad Cabirli və üzvləri iştirak edib. İftar proqramından öncə, MÜSİAD Azərbaycan İdarə Heyəti üzvləri və Türkiyə Respublikasının Azərbaycandakı fövqəladə və səlahiyyətli səfiri və digər rəsmilər, Şabran şəhərində əzəmətlə ucalan ulu öndər Heydər Əliyevin abidəsini və Şabran rayon Şəhidlər Xiyabanını ziyarət ediblər. Bununla yanaşı, Şabran Rayon İcra Hakimiyyətinin başçısı Asif Hüseynov ilə görüş keçirilib. Daha sonra isə iftar mərasimi baş tutub. İftar mərasimində çıxış edən Türkiyə Respublikasının Azərbaycandakı fövqəladə və səlahiyyətli səfiri Birol Akgün, Ramazanda birlik və həmrəyliyin vacibliyinə diqqət edərək qeyd edib ki, “Bizim istəyimiz Azərbaycan və Türkiyə qardaşlığının əbədi olmasıdır. Bu qardaşlıq həm dostlara, həm də düşmənlərə böyük bir mesajdır. Türkiyə və Azərbaycan nə qədər güclü olsa, Türk dünyası da özünü o qədər güclü hiss edir. Allah birlik və bərabərliyimizi qorusun” Şabran Rayon İcra Hakimiyyətinin başçısı Asif Hüseynov Ramazan ayı münasibətilə mərasim iştirakçılarını təbrik edərək, tutulan orucların və edilən duaların qəbul olunmasını arzulayıb. Azərbaycanın hər bir bölgəsində olduğu kimi, Şabranda da multikulturalizm ənənələrinin hökm sürdüyünə diqqət çəkən rayon rəhbəri, digər xalqlar və etnik qruplar kimi, Axısqa türklərinin də Şabranda mehriban şəraitdə yaşadığını və dövlətin qayğısını hiss etdiklərini bildirib. Asif Hüseynov,həmçinin MÜSİAD Azərbaycan İctimai Birliyinə mərasimin yüksək səviyyədə təşkilinə görə dərin təşəkkürünü bildirib. MÜSİAD Azərbaycan İctimai Birliyinin idarə heyətinin sədri Rəşad Cabirli çıxış edərək Azərbaycan və Türkiyə qardaşlığının sarsılmaz və əbədi olduğunu vurğulayıb. O, 44 günlük Vətən müharibəsində bunun bir daha parlaq şəkildə öz təsdiqini tapdığını bildirib.Rəşad Cabirli torpaqların bütövlüyü uğrunda canlarından keçən şəhidləri yad edərək, onların daim ehtiramla anılmasının və unudulmamasının vacibliyini vurğulayıb. İftar süfrəsində din xadimləri “Qurani-Kərim”dən ayələr oxuyub, Ramazan ayının fəzilətlərindən danışıb. Şəhidlərimizin əziz xatirəsi böyük ehtiramla yad edilib. Onuda qeyd edək ki, MÜSİAD Azərbaycan hər il Ramazan ayında ənənəvi iftar süfrələri təşkil edir. #Azərbaycan #Ramazan #Şabran #iftar #MÜSİAD