LİVAN İSRAİL ORDUSUNUN ÖLKƏ ƏRAZİSİNƏ DAXİL OLMASINI TƏKZİB EDİB

İsrail ordusu Livan ərazisinə daxil olub. Bununla bağlı Teleqram kanallarında görüntülər yayılıb. Görüntülərə əsasən, İsrail tankları, digər zirehli texnikaları axşam saatlarında Livan ərazisinə giriblər. Digər bir xəbərə görə isə, Livanın cənubundakı Sayda şəhərinin Ayn əl-Delb qəsəbəsində yaşayış binasına zərbə endirilib. Hücum nəticəsində azı 45 nəfər ölüb, 70 nəfər isə yaralanıb. Bildirilib ki, İsrailin hava hücumu nəticəsində bina tamamilə uçub. Sözügedən yaşayış yerində Livanın cənubundan olan qaçqınlar məskunlaşıbmış. İsrail quru qüvvələrinin Livana daxil olmasının rəsmi görüntüləri də yayılıb. 98-ci diviziyanın bölmələri, 7-ci İDF briqadasının komandoları, paraşütçüləri və zirehli texnikası Livan ərazisinə daxil olub. Livanın "Əl Mayadeen" telekanalının yaydığı bilgiyə görə isə İsrail hərbi hissələrinin Livan ərazisinə daxil olması faktı hələ ki təsdiqini tapmayıb. Xatırladaq ki, İsrail ordusu "Hizbullah"ın Livanın cənubunda yerləşən infrastrukturuna qarşı məhdud quru əməliyyatlarına başladığını elan edib. Məlumat SAXAL-ın "Telegram" kanalında dərc edilib. Dünyanın bir çox aparıcı informasiya agentlikləri isə Livanın "Əl Mayadeen" telekanalından fərqli olaraq İsrail ordusunun Livan ərazisinə daxil olduğunu yazıb.