İSRAİL QƏZZAYA YENİDƏN BOMBA YAĞDIRDI

Qətər, Misir Ərəb Respublikası və ABŞ Qəzzada münaqişə tərəfləri arasında əsir və girov mübadiləsi, daimi atəşkəs rejiminin bərpası, habelə fələstinli qardaşlarımıza böyük həcmdə humanitar yardımların çatdırılması ilə bağlı razılığın əldə olunduğunu açıqlamaqdan məmnundur. Bu sözləri Qətərin Baş naziri və xarici işlər naziri Şeyx Məhəmməd bin Əbdül Rəhman əs-Sani bildirib. Nazirin açıqladığı bu müjdəli xəbər bütün regionda sevinclə qarşılanıb. Qəzzada küçələrə axışan fələstinlilər atəşkəs xəbərini coşquyla qeyd ediblər. İsraildə isə girovların azad olunacağını eşidən yaxınları bir-birini təbrik edir, atəşkəsi bayram edirlər. Lakin atəşkəs sazişi ilə bağlı yaranan ümidin yerini, getdikcə qorxu və təlaş almağa başladı. Həmasa qarşı hərbi əməliyyatları davam etdirən İsrail ordusu növbəti dəfə Qəzzaya havadan bomba yağdırdı. Nəticədə 20-dən çox fələstinli həyatını itirdi, 78 nəfər isə yaralandı. İsrailin Baş naziri Benyamin Netanyahu, "Həmas son anda güzəşt əldə etmək üçün sazişin vasitəçilərlə razılaşdırılmış bəzi hissələrindən imtina etdi",- deyə qeyd edib. Dəftərxanadan həmçinin qeyd edilib ki, HƏMAS razılaşmanın bütün şərtlərini təsdiq etməyənə qədər İsrail Qəzza zolağına dair sazişlə bağlı Nazirlər Kabinetinin iclasının tarixini təyin etməyəcək. Həmasın cavabı da özünü çox gözlətmədi. Hərəkatın Siyasi Bürosunun üzvü İzzət əl-Rişk bildirdi ki, HƏMAS vasitəçilərin elan etdiyi atəşkəs razılaşmasına sadiqdir. 3 gün sonra qüvvəyə minəcək atəşkəs razılaşmasına əsasən 42 gün davam edəcək birinci mərhələdə təxminən min fələstinli məhbus qarşılığında 33 israilli girovun azad edilməsi nəzərdə tutulur. İsrail qoşunları Qəzza zolağının sərhədlərinə çəkilməli olsa da, hələlik onun hüdudlarında qalacaq. Atəşkəsin ilk günündən etibarən humanitar yardımın gündəlik həcmi 50 yanacaq maşını da daxil olmaqla 600 yük maşınına çatdırılacaq. Fələstinlilər 200 min çadır və 60 min mobil evlə təmin olunacaqlar. 2-ci mərhələdə İsrail qoşunlarının Qəzzadan tam çıxarılması və müharibənin başa çatdığı elan edilməlidir. Sonuncu mərhələ isə Qəzzanın bərpasının başlanmasını nəzərdə tutur.