İRAN ERMƏNİ TERRORUNA GÖRƏ NARAHATDIR

Bədnam qonşularımızın dağ-mədən sənayesinin zəhərli tullantıları Azərbaycanın təbii su ehtiyatlarına, çaylarına axıdılır. Ermənistanda qiymətli metalların hasilatı ilə məşğul olan 26 şirkətdən təxminən yarısı Qərbi Zəngəzurda yerləşir ki, buradan atılan tullantılarında demək olar ki, hamısı Araz və digər çaylarımıza axıdılır. Ekspertlər bildirirlər ki, Araz çayının Oxçuçay kimi qollarının bu şəkildə çirkləndirilməsi Xəzərdə balıqların təbii yolla artımına da mənfi təsir göstərir. Ermənistanın ekoloji terroru təkcə bizə qarşı yönəlmiyib, İranın da bundan ziyan gördüyü heç kimə sirr deyil. Belə ki, bir qrup vətəndaş və ətraf mühit fəalı Araz çayının çirkləndirilməsi ilə bağlı İran Prezidenti Məsud Pezeşkiana müraciət ünvanlayıb. Bu barədə İranın “Xazar” xəbər saytında bilgi yayılıb. “Son illər hökumətin Araz çayının çirklənməsi ilə bağlı mühüm və həyati əhəmiyyət kəsb edən məsələni diplomatik və təhlükəsizlik məqsədləri xatirinə gizlətməsinə baxmayaraq, bu transsərhəd çayın ekosistemini və onun ətrafında yaşayan sakinlərin sağlamlığına təhdidi gizlətmək mümkün deyi”, -deyə müraciətdə bildirilib. Müraciəti imzalayanlar ekoloji problemin araşdırılması və həlli üçün təkliflər irəli sürüb, səbəbkarlar barədə tədbir görülməsini tələb ediblər. Qeyd edək ki, bundan əvvəl iranlı ekoloqlar və bəzi millət vəkilləri Ermənistanın zəhərli tullantıları Araz çayına axıtması ilə bağlı bir neçə dəfə məsələ qaldırıb, İran hökumətinin problemlə bağlı əməli tədbir görməsini istəyiblər. Ekspertlərin fikrincə, Ermənistanın köhnəlmiş Metsamur AES-nin zəhərli tullantılarının çaya axıdılması Araz çayının çirkləndirilməsində əhəmiyyətli dərəcədə rol oynayır. #Ekologiya#Azərbaycan#Zəngəzur#Iran#Ermənistan#Arazçayı# #çirkləndirilme#