İLAXIR ÇƏRŞƏNBƏ – TORPAĞIN OYANAN GÜNÜ

Bu gün torpağın və həyatın oyandığı İlaxır çərşənbə - Torpaq çərşənbəsidir. İlaxır çərşənbə Su, Od və Yel çərşənbələrindən sonra gəlir. Bu çərşənbəyə xalq arasında "Yer çərşənbəsi", "İlaxır çərşənbə" və ya "Torpaq çərşənbəsi" də deyilir. İnanca görə, sonuncu çərşənbədə yer oyanır, torpaq nəfəs alır. Torpaq bütün canlılara həyat verir və uca Allahın yaratdıqlarının hamısı, o cümlədən insanlar onun qoynuna sığınırlar. Torpaq çərşənbəsində digər çərşənbələrdəki kimi simvolik məzmunlu rituallar və ayinlər keçirilir ki, bunlar da bayram ənənəsinin təbii tələbidir. İlaxır çərşənbənin özündən əvvəlki digər üç çərşənbədən daha təmtəraqlı keçirilməsi onun yekun aktı kimi dəyərləndirilməsi ilə əlaqədardır. Çünki Axır çərşənbə mahiyyət baxımından özündən əvvəlki üç çərşənbənin ümumiləşdirilmiş, yəni yekunlaşdırıcı şənliyidir. Bununla da köhnə ilin yola salınması və yeni ilin qarşılanması ərəfəsi məhz ilin axırıncı çərşənbəsinin üstünə həvalə olunur. Ailəniz sağlam, tonqalınız isti, ocağınız hənirtili, süfrələriniz ruzi-bərəkətli, arzu-niyyətləriniz çin olsun! İlaxır çərşənbəniz qutlu olsun! #Azərbaycan #Novruz #İlaxırçərşənbə #bayram #bahar #yaz