GÜLƏŞÇİLƏRİMİZ BEŞ MEDAL QAZANIBLAR

Türkiyədə keçirilən v İslam Həmrəyliyi Oyunlarının növbəti günü güləşçilərimiz üçün uğurlu alınıb.Təmsilçilərimizdən 55 kq. – da çıxış edən Eldəniz Əzizli bütün rəqiblərinə qalib gələrək birinci olub. O, həlledici görüşdə Özbəkistan idmançısını 10 – 1 hesabı ilə məğlub edib. 82 kq. – da yarışan daha bir Yunan – Roma güləşçimiz Rafiq Hüseynov İslamiadanın qızıl medalına yiyələnib. Güləşçimiz finalda Qırğızıstan pəhlivanı ilə keçirdiyi gərgin mübarizəni 6 – 3 hesablı qələbə ilə başa vurub. Daha bir nümayəndəmiz 72 kq. – da yer alan Ülvi Qənizadə finala qədər irəliləsə də, həlledici görüşdə məğlub olaraq gümüş medalla kifayətlənməli olub. Qadın güləşçilərimiz də komandamızın aktivinə mükafatlar yazdırmaqda kişilərdən geri qalmayıblar. Belə ki, 65 - kq. – da döşəyə çıxan Eli Monolova qızıl medal uğrunda yarışmada sonuncu xal prinsipinə əsasən məğlub olub və turniri ikinci pillədə yekunlaşdırıb. Elnurə Məmmədova isə bürünc medal uğrunda görüşdə qələbə qazanıb.