ERMƏNİSTAN AZƏRBAYCAN TƏRƏFİNİN TƏKLİFLƏRİNİ QƏBUL ETDİ

Ermənistan sülh sazişi mətnində razılaşdırılmayan maddəni, yəni üçüncü ölkələrə məxsus qüvvələrin sərhəddən çıxarılmasını qəbul edib. Bu, Azərbaycanın əsas tələblərindən biri idi. Ermənistanın Baş naziri Nikol Paşinyan bildirib ki, Azərbaycanla Ermənistan arasında sülh sazişi layihəsinin razılaşdırılması mühüm hadisədir. "Sülh sazişində Avropa Birliyinin Ermənistandakı mülki missiyası barədə heç bir maddə yoxdur. Sazişdə üçüncü qüvvələrin yerləşdirilməməsi nəzərdə tutulur. Bu, həm Ermənistana, həm də Azərbaycana aiddir”, - deyə o bildirib. Habelə erməni baş nazir sülh müqaviləsi imzalandıqdan sonra müşahidəçilərin Ermənistan-Azərbaycan sərhədini tərk edəcəkəklərini də əlavə edib. Qeyd edək ki, Azərbaycan Xarici İşlər Nazirliyi Ermənistanla sülh sazişinin razılaşdırıldığı ilə bağlı bəyanat yayıb. Xarici işlər naziri Ceyhun Bayramov jurnalistlərə açıqlamasında bildirib ki, açıq qalan iki maddə üzrə Ermənistan Azərbaycan tərəfinin təkliflərini qəbul edib. "Növbəti addım olaraq Azərbaycanın gözləntisi Ermənistan konstitusiyasında dəyişiklik edilməsidir". Bu isə onu deməyə əsas verir ki, Sülh Sazişinin mətni ilə bağlı danışıqlar prosesi yekunlaşdı. #Azərbaycan #Ermənistan #Sülh #SülhSazişi #sərhəd