BƏŞİR SƏFƏROĞLUNUN 100 İLLİK YUBİLEYİ QUBADA QEYD OLUNDU

Bəşir Səfəroğlu adına Quba rayon Mədəniyyət Mərkəzində Quba Rayon İcra Hakimiyyətinin, Quba-Xaçmaz Regional Mədəniyyət İdarəsinin, Bəşir Səfəroğlu adına Quba rayon Mədəniyyət Mərkəzinin və Azərbaycan Dövlət Akademik Musiqili Teatrının birgə təşkilatçılığı ilə 8 Mart - Beynəlxalq Qadınlar Günü, 10 Mart - Azərbaycan Milli Teatr Günü və 11 mart - Xalq artisti Bəşir Səfəroğlunun 100 illik yubileyi münasibətilə tədbir keçirilib.Habelə milyonların sevimli gülüş ustası, Xalq artisti Afaq Bəşirqızının iştirakı ilə görkəmli yazıçı-dramaturq Əli Səmədlinin “Toya bir gün qalmış” tamaşası da nümayiş etdirilib. Tədbirdə Quba Rayon İcra Hakimiyyətinin məsul şəxsləri, idarə, müəssisə və təşkilatların rəhbərləri, şəhid ailələri, qazilər, təhsil, mədəniyyət işçiləri, gənclər və tələbələr, həmçinin rayon ictimaiyyətinin digər nümayəndələri iştirak edib. Gözlənilməz və maraqlı situasiyalarla zəngin tamaşada cərəyan edən hadisələr oğlunun toyuna bir gün qalmış vəzifəli şəxsin dünyasını dəyişməsi ilə başlayır. Onun həyat yoldaşının isə bunu hamıdan gizlətməsi vəziyyəti daha da mürəkkəbləşdirir. Qadın düşünür ki, ərinin ölümünü ört-basdır etməsə, toy təxirə düşəcək və onların bir sıra maraqlarına zərbə dəyəcək. Beləliklə, ailə dəfn işləri ilə məşğul olmaqdansa, toy hazırlıqlarını davam etdirir. Günümüzün reallıqlarını əks etdirən “Toya bir gün qalmış” tamaşası, gülməli olduğu qədər də tamaşaçını düşünməyə məcbur edir. Tamaşadan sonra Quba RİH başçısının birinci müavini Taryel İbrahimov çıxış edərərk kollektivə gələcək fəaliyyətlərində uğurlar arzulayıb. Sonda Afaq Bəşirqızı yaradılan şəraitə görə rayon rəhbərliyinə, tamaşaçılara və şəhid ailələrinə , habelə tədbirin ərsəyə gəlməsində xidməti olan hər kəsə minnətdarlığını bildirdi. #Quba #Teatr #tamaşa