Xalq artisti, Azərbaycanda ilk peşəkar teatr təhsili görmüş qadın-aktrisa Fatma Qədri 14 aprel 1907-ci ildə Odessa şəhərində doğulub.
Azərbaycan Teatr Texnikumunun ilk buraxılışında aktyor diplomu alıb. 1926-cı ildə Azərbaycan Pedaqoji İnstitutunu bitirib və səhnə fəaliyyətinə də həmin ildə Bakı Türk İşçi Teatrında başlayıb. Bir sıra tamaşalarda yaddaqalan obrazlar yaradıb. 1932-1935-ci illərdə Bakı Rus Dram Teatrının aktrisası olub, 1933-cü ildən pedaqoji fəaliyyət göstərib, 1935-ci ildən isə Azərbaycan Milli Dram Teatrında işləyib. Fatma Qədri 1968-ci il fevralın 29-da Bakıda vəfat edib.Azərbaycan telejurnalisti Alı Mustafayev 1952-ci ilin bu günü Qazaxda anadan olub.Dolğun məzmunlu reportaj, oçerk, müsahibə və təsirli proqramları ilə tanınan telejurnalist Dağlıq Qarabağda qanlı döyüşlər getdiyi vaxt cəbhənin qaynar nöqtələrindən operativ verilişlər hazırlayıb. Alı Mustafayev 1991-ci il noyabrın 20-də Qarabağda Qarakənd yaxınlığında vertolyotun erməni terrorçuları tərəfindən vurulması nəticəsində 39 yaşında həlak olub. Bu gün Hindistanda Rongali Bihu festivalı keçirilir. Əkinçilik bayramı olan Rongali Bihu hər il aprel ayının 14-16-sı arası qutlanır. Yazın gəlişi və əkinçiliyin başlaması üçün qeyd edilən bu bayram 3 gün davam edir. Bayramın ilk gün əkinçilik üçün vacib olan inəklərə həsr olunur. İkinci gün dostları və qohumları ilə bol bol mahnı oxuyub rəqs edir. Üçüncü gün tanrılara ibadət olunur.