AZƏRBAYCANIN İLK VƏ ƏN UZUN DƏMİRYOL TUNELİ

Horadiz-Ağbənd dəmiryol xəttində ikinci tunelin qazma işləri yekunlaşıb. Bu barədə Azərbaycan Dəmir Yolları QSC bilgi yayıb. Bildirilib ki, Azərbaycan Prezidentinin müvafiq Sərəncamı ilə yaradılmış işğaldan azad edilmiş ərazilərində məsələlərin mərkəzləşmiş qaydada həlli ilə bağlı Əlaqələndirmə Qərargahının İdarələrarası Mərkəzinin nəzdində fəaliyyət göstərən Nəqliyyat, rabitə və yüksək texnologiyalar üzrə İşçi qrupundan verilən bilgiyə görə, Horadiz–Ağbənd dəmiryol xəttində həyata keçirilən tikinti işlərinin 62%-i tamamlanıb. “Ox üzrə uzunluğu 110,4 km olan yolun 104 və 106-cı km-lərində dəmiryol tunelləri inşa olunur. Tunellərdən biri müstəqil Azərbaycanın tarixinin ilk, digəri isə ölkənin ən uzun dəmiryol tunelidir. 106-cı km-də uzunluğu 1 071 metr olan tuneldə artıq qazma işləri yekunlaşıb və bununla tunel tikintisinin 65%-i tamamlanıb. Qazma işlərindən sonra tuneldə izolyasiya və üzləmə işləri yerinə yetiriləcək”, - deyə bilgidə qeyd edilib.