AZƏRBAYCANDA ƏRZAQLIQ BUĞDANIN İSTEHSALI KƏSKİN ARTACAQ

Ərzaq mallarının qiymətinin qalxması Azərbaycana bir növ idxal olunub. Çünki biz hələ də özümüzü tam, yəni, 100 faiz əsas ərzaq məhsulları ilə təmin edə bilmirik. Bunu Prezident İlham Əliyev Basqal qəsəbəsində Azərbaycan Televiziyasına müsahibəsində deyib. Dövlət başçısı problemin həlli istiqamətində ardıcıl işlərin aparıldığını da qeyd edib. Daxili istehsalı artırmaq üçünsə, istər ümumi iqtisadiyyatda, istərsə də kənd təsərrüfatı və emal müəssisələrinin inkişafında Azərbaycan ekstensiv inkişafın intensiv formasını tətbiq etməyi düşünür. Bu gün dünyada yaşanan taxıl qıtlığının əsas səbəbi Rusiya-Ukrayna müharibəsidir. Müharibə nəticəsində bir çox ölkələr fiziki cəhətdən öz əhalisini buğda ilə, taxılla təmin edə bilmirlər. Ancaq Azərbaycanda bu sahədə heç bir problem yoxdur. Ölkəmiz ənənəvi olaraq taxılı da, gübrəni də Rusiyadan alır. Bu ölkə ilə əldə edilmiş razılaşmaya əsasən Azərbaycana yetəri qədər həm taxıl, həm də gübrə ixrac edilir və ediləcək.