Türkiyənin İzmir şəhərində 15-ci Beynəlxalq Kənd Təsərrüfatı və Heyvandarlıq Sərgisi keçirilib.Sərgidə Azərbaycan tərəfdən Dövlət Toxum Fondunun nümayəndələri iştirak edib.
Əkinçilik və heyvandarlıq sahəsinə həsr olunan sərgidə 70 ölkədən 854 şirkət öz məhsullarını nümayiş etdirib və sərgiyə 337 000-dən artıq iştirakçı qatılıb.İştirakçılara toxumun fərqli dərinlikdə torpağa əkilmə qaydaları, dərmanlarda istifadə yolları, biçinin daha qısa zaman ərzində tamamlanması və digər aqrotexniki tədbirlər barədə məlumat verilib. Sərgini ziyarət edənlər Şərqi Avropa və Mərkəzi Asiyadan dəvət olunan mütəxəssislərin təcrübələri ilə tanış olmaq imkanı qazanıblar.Sərgi çərçivəsində Dövlət Toxum Fondunun təmsilçiləri Türkiyənin tanınmış və lider toxum şirkəti olan “MAY Seed” şirkətinin nümayəndələri ilə görüşüb. Görüşdə əkin sənayesində mövcud innovasiyalar və texnologiyalar müzakirə edilib, məşhur şirkətlə əməkdaşlıq imkanları barədə fikir mübadiləsi aparılıb.