RUSİYA BAKI İLƏ İRƏVAN ARASINDA BİRBAŞA DİALOQU DƏSTƏKLƏYİR

İndiki mərhələdə Donald Tramp administrasiyasının Cənubi Qafqazla bağlı siyasətini proqnozlaşdırmaq çətindir. Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova Moskvada keçirilən brifinqdə bildirib. Onun sözlərinə görə, ötən illərin təcrübəsi göstərir ki, qeyri-regional oyunçuların, o cümlədən ABŞ və Avropa ölkələrinin müdaxilə edilməsi region üçün müsbət nəticə verməyib. Moskva hesab edir ki, Bakı ilə İrəvan arasında münaqişənin nizamlanmasının əsasını Rusiya, Azərbaycan və Ermənistan liderlərinin üçtərəfli bəyanatlar kompleksi təşkil edir, - deyə diplomat xatırladıb. O vurğulayıb ki, Rusiya Bakı ilə İrəvan arasında birbaşa dialoqu dəstəkləyir və münasibətlərin normallaşdırılmasına, balanslaşdırılmış sülh müqaviləsinin işlənib hazırlanmasına, nəqliyyat və iqtisadi əlaqələrin açılmasına, sərhədlərin delimitasiyası və demarkasiyasına, habelə vətəndaş cəmiyyətləri arasında əlaqələrin inkişafına köməklik etməyə hazırdır. Rusiya Xarici İşlər Nazirliyinin rəsmi nümayəndəsi əlavə edib ki, üç Cənubi Qafqaz dövlətini yəni bura Azərbaycan, Ermənistan və Gürcüstan daxildir. Və üç qonşu dövləti bura isə Rusiya, İran və Türkiyə daxildir ki, bu üçlükləri birləşdirən “3+3” platforması perspektivli regional əməkdaşlıq mexanizminə çevrilə bilər.