QUBADA POLAD HƏSİMOVUN XATİRƏSİNƏ KİKBOKSİNQ TURNİRİ KEÇİRİLİB

Quba Olimpiya İdman Kompleksində şəhid Kərəm Veysovun arzusu əsasında general Polad Həsimovun xatirəsinə kikboksinq üzrə turnir keçirilib. Yarışın açılış mərasimində Gənclər və İdman İdarəsinin nümayəndələri, Xaçmaz təhsil sektorunun müdiri, general Polad Həşimovun qardaşı, Şəhid Kərəm Veysovun ailəsi və digər şəhid ailələri, Şəhid arzusunun iziylə layihəsinin qalibi və ictimaiyyət nümayəndələri iştirak ediblər. Əvvəlcə Dövlət Himni səsləndirilib, şəhidlərin xatirəsi bir dəqiqəlik sükutla yad olunub. Açılış mərasimində çıxış edənlər general-mayor Polad Həşimov və Şəhid Kərəm Veysovun həyatından, döyüş yolundan və 44 günlük Vətən müharibəsində şanlı ordumuzun qələbəsindən danışıblar. General-mayor Polad Həşimovun qardaşı vətənimizin azadlığı və müstəqilliyi uğrunda canından keçmiş şəhidlərimizin xatirəsinin xalqımız tərəfindən daim əziz tutulduğundan, dövlətimiz tərəfindən şəhid ailələrinə göstərilən diqqət və qayğıdan danışdı. Belə layihələrin daha çox olmasını arzulayaraq, layihə rəhbərinə minnətdarlığını bildirdi. Şəhid Kərəm Veysovun anası çıxış edərək bildirdi ki, Kərəmin uşaqlıqdan idmana marağı vardı. Kikboksinq üzrə beynəlxalq yarışlarda uğurlar qazanmışdı. Ən böyük arzusu isə General-mayor Polad Həşimovun xatirəsinə belə bir turnirin keçirilməsi idi. Bu gün onun arzusunu reallaşdıran Arzu Nəsibovaya və onun yaradıcı birliyinə təşəkkürünü bildirdi. Çıxışlardan sonra turnirə start verildi. Turnirdə şimal bölgəsindən olan 75-dən cox idmançısı iştirak edib. Gərgin idman mübarizəsi şəklində keçən görüşlər nəticəsində 3 çəki dərəcəsi üzrə qaliblər müəyyən edilib. Üç nəfər birinci yerə ,üç nəfər ikinci yerə, altı nəfər isə üçüncü yerə layiq görülüb. Qaliblər medal,diplom və hədiyyələrlə mükafatlandırılıblar. Qeyd edək ki, turnir Xaçmaz rayon Gülalan kənd tam orta məktəbinin müəllimi Arzu Nəsibovanın VIII qrand layihəsində qalib olduğu Şəhid arzusunun iziylə layihəsi çərçivəsində baş tutub. Layihənin rəhbəri Arzu Nəsibova, məşq təlimçisi Telman Məhərrəmov, moderatoru Təranə Məhərrəmova, eksperti isə Azərbaycan Kikboksinq Federasiyasının baş katibi İlkin Məsimzadədir.