QUBADA ELÇİN ŞIXLI İLƏ GÖRÜŞ KEÇİRİLİB

ADPU-nun Quba filialında tələbə və müəllim heyətinin istəyi ilə Azərbaycan Jurnalistlər Birliyinin sədri, Azərbaycan Yazıçılar Birlyinin üzvü, “Ayna” Mətbu Evinin rəhbəri, Əməkdar jurnalist Elçin Şıxlı ilə "MƏNƏVİ TARAZLIĞI QORUYAN ADAM” adlı tədbir keçirilib. Tədbiri açıq elan edən filialın Ədəbiyyat və dillər kafedrasının müəllimi Günəş Xudayarova qeyd edib ki, hər bir şəxsiyyət üzləşdiyi mühitdən əvvəl məhz ailə ocağında yetişir, formalaşır, gələcək həyat yolunu müəyyənləşdirməyə çalışır. Sonra Günəş Xudayarova sözü filialın direktoru Yusif Alıyevə verib. Yusif Alıyev çıxışında Elçin Şıxlıya dəvəti qəbul edib gəldiyi üçün dərin təşəkkürünü bildirib, filial kollektivi adından ona gül dəstəsi və hədiyyə təqdim edib. Tədbir filialın tələbəsi Cəvahir Qocayevanın moderatorluğu ilə davam edib.Filialın Ədəbiyyat və dillər kafedrasının müəllimi Kəmalə Bayramova “Elçin Şıxlı şəxsiyyətində İsmayıl Şıxlı bənzərliyi” adlı məruzə ilə çıxış etdi. O, Xalq yazıçısı İsmayıl Şıxlının yaradıcılığını və Şəxsiyyətini Elçin Şıxlı paralelliyi ilə müqayisə edərək ata və oğulun bir çox xüsusiyyətlərinin eyni olduğunu diqqətə çatdırdı.Tədbirdə tanınmış şair, Azərbaycan Yazıçılar Birliyinin Quba bölməsinin sədri Ramiz Qusarçaylı və filailın Ədəbiyyat və dillər kafedrasının baş müəllimi, şair Rahib Sədullayev çıxış edərək qeyd etdilər ki, Elçin Şıxlı yaradıcılığında ilahi işarə olan söz çox mükəmməl şəkildə özünə yer tapmışdır. Sonra videobağlantı ilə tədbirə qatılan əməkdar jurnalist, televiziya tənqidçisi, publisist, filologiya elmləri doktoru Qulu Məhərrəmli də tədbir iştirakşılarını salamlayaraq, bu cür görüşlərin tələbələrin və müəllimlərin fəaliyyətlərində mühüm əhəmiyyət kəsb etdiyini bildirdi. Sonra müəllim və tələbələrinin ünvanladığı suallara Elçin Şıxlı cavab verərək filialın tələbələrinin aktivliyindən, müəllimlərin dərin təhlil qabiliyyətinin olmasından çox məmnun qaldığını bildirib. Daha sonra tədbirdə filialın tələbəsi Səma Asəfova jurnalist kimi Elçin Şıxlıya suallar ünvanlamış, filialın tələbələrinin təqdimatında "Dəli Kür" filmindən fraqment nümayiş olunub, filmdən “Ana Kürüm” musiqisi filialın tələbələrinin ifasında səsləndirilib. Tədbirdə həmçinin Filialın ART İncəsənət klubunun üzvləri tərəfindən Elçin Şıxlının portretləri çəkilib, xalq yazıçısı İsmayıl Şıxlının çəkilmiş rəsmləri nümayiş edilib.Tədbirin sonunda Elçin Şıxlı ADPU-nun Quba filialında təşkil edilən maraqlı, rəngarəng səhnələrlə dolu olan görüşə görə filialın rəhbərliyinə təşəkkürlərini bildirərək, ADPU-nun rektoru professor Cəfər Cəfərova salamlarını çatdırmağı xahiş etdi. Sonda xatirə şəkli çəkdirilib.