QARABAĞLA BAĞLI QEYDLƏRİN ÇIXARILMASI TƏLƏB EDİLİR

Ermənistan Konstitusiyasının yeni mətninin hazırlanması üzrə xüsusi şura çox yaxın vaxtlarda fəal işə başlayacaq. Baş nazir Nikol Paşinyan Azərbaycanla sülhün bağlanması üçün Ermənistan Konstitusiyasına dəyişikliklər edilməsinə icazə verib. Bu barədə bilgini erməni KİV-ləri yayıb. “Şura yaxın vaxtlarda ölkənin yeni əsas qanununun yazılması ilə bağlı fəal iclaslar keçirəcək”, - deyə hraparak nəşri qeyd edir. Düzəliş edilmiş layihənin Ermənistan cəmiyyətinin tələbinə uyğun olaraq təqdim ediləcəyi vurğulanır. Rəsmi Bakı sülh sazişinin bağlanması üçün Ermənistan Konstitusiyasının dəyişdirilməsini zəruri hesab edir. Azərbaycan tərəfi Konstitusiyadan Qarabağla bağlı istənilən qeydin çıxarılmasını tələb edir. Xatırladaq ki,Avqustun 8-də Vaşinqtonda Azərbaycan prezidenti İlham Əliyev və Ermənistanın baş naziri Nikol Paşinyan ABŞ-ın vasitəçiliyi ilə ikitərəfli sülh sazişini paraflayıblar. Prezident İlham Əliyev bildirib ki, bu, ölkələr arasında 30 ildən artıqdır ki, mərhələli şəkildə davam edən müharibəyə son qoyacaq. Əgər ratifikasiya prosesində Konstitusiya Məhkəməmiz paraflanmış və yekunda imzalanmış sülh sazişinin Konstitusiyaya zidd olduğuna qərar verərsə, mən özüm konstitusiya dəyişikliklərin edilməsi təşəbbüsü ilə çıxış edəcəm”, - deyə Nikol Paşinyan bildirib. Nikol Paşinyan onuda xatırladıb ki, Ermənistan Konstitusiyasına dəyişiklik edilməsi məsələsi artıq gündəmdədir. Onun sözlərinə görə, hökumət sənəd layihəsini hazırladıqdan və dəyişikliklərlə bağlı referendum keçirdikdən sonra 2027-ci ildə yeni Konstitusiyanın qəbulu imkanlarını nəzərdən keçirir. O vurğulayıb ki, Bakı ilə münasibətlərin tənzimlənməsi bu prosesə təsir edə bilər, lakin Konstitusiyanın dəyişdirilməsi sülh prosesindən asılı deyil.