Azərbaycanda kəklikotu bitkisi çox geniş yayılıb. Özəlliklə dağlıq rayonlar bitən bu bitkinin hündürlüyü 20 sm-dən 35 sm-ə qədərdir. 400-ə qədər növü olan
kəklikotunun yaşıl yerüstü hissəsini, bitki çiçəklədikdə və ya ondan əvvəl yığırlar. Bu bitkidən müxtəlif yeməklərin və çayların hazırlanmasında istifadə edilir. Amma bir baxın hələ ta qədim zamanlardan bizim mətbəximizin demək olar ki, vaz keçilməzi olan kəklikotunu necə istifadə ediblər. Deməli, Qədim yunanlar kəklikotunu gözəllik ilahəsi Afroditanın şərəfinə yandırıblar. Kəklikotu onlar üçün həm də zəhmətsevərlik rəmzi olub. Qədim slavyanlar isə kəklikotu dəstələri ilə ikonalarını bəzəyirdilər. Belə hesab olunurdu ki, bu bitki insana nəinki sağlamlığını, hətta həyatını qaytara bilər. Elə bu inama görə də bayılma zamanı kəklikotunun tozunu iyləyirdilər. Amma kəklikotunun gerçək faydaları ilə bağlı İbn Sinanın əsərlərində rast gəlinir. İndi gəlin şəfalı bitkilər sırasında yer alan kəklikotunun faydaları ilə tanış olaq. Kəklikotu sinir sisteminə çox müsbət təsir edir, beyində qan dövranını və mübadilə proseslərini yaxşılaşdırır, əsəbləri sakitləşdirir, əhval-ruhiyyəni yüksəldir. Başağrıları zamanı yeni dəmlənmiş kəklikotulu çay içmək məsləhətdir. Bu zaman həm də xroniki yorğunluq aradan qalxır, yuxu bərpa olunur. Kəklikotu yaddaşı gücləndirir. Onun qəbulu immun sistemi üçün də çox xeyirlidir. Kəklikotulu çay hazırlamaq üçün 1 çay qaşığı quru kəklikotunu 1 stəkan qaynar suda 20 dəqiqə dəmləmək lazımdır. Çaya bal və limon da əlavə etmək olar. Soyuqdəymə xəstəliklərinin ilk əlamətləri özünü büruzə verəndə bu çay çox yaxşı təsir edir, xəstəliyin inkişafının qarşısını alır. Kəklikotu həm də güclü ağrıkəsicidir, antibakterial və antiseptik təsirə malikdir, onun köməyi ilə başağrısı və bağırsaq spazmını aradan qaldırmaq olar. Kəklikotu dəmləməsi ağız boşluğu iltihabları, tonzilit zamanı qarqara üçün istifadə olunur. Kəklikotu bəlğəmgətirici xüsusiyyətə malik olduğuna görə respirator xəstəlikləri zamanı da geniş istifadə olunur. Bağırsaqlarda yaşayan zərərli mikroorqanizmləri yox edir, qurdqovucu təsir göstərir. Kəklikotu yağı isə güclü yara sağaldan xüsusiyyətə malikdir. Yanıqlar, xoralar və donvurma zamanı kəklikotu yağından istifadə olunur. Hamilə qadınların kəklikotudan istifadə etməsi məsləhət görülmür.