JURNALİSTLƏRƏ HƏSƏN BƏY ZƏRDABİ MÜKAFATI VERİLDİ

Azərbaycan Jurnalistlər Birliyi Milli Mətbuatın 150-ci ildönümü münasibətilə Həsən bəy Zərdabi adına mükafatın təqdimatını edib. Mükafata bu il 15 media nümayəndəsi layiq görülüb. Təltif edilən media nümayəndələri Azərbaycan Jurnalistlər Birliyinə təşəkkürlərini çatdırıblar.Təltif olunan jurnalistlər təəssüratlarını bölüşüb, belə bir mükafata layiq görülmənin onlar üçün sevindirici olduğunu vurğulayıblar. Diqqətə çatdırılıb ki, Həsən bəy Zərdabi adına mükafat jurnalistlər üçün təsis edilən ən vacib mükafatlardan biridir. Mükafatı AJB-in sədri, “Ayna-Zerkalo” qəzetinin rəhbəri Elçin Şıxlı və Əməkdar jurnalist, professor Qulu Məhərrəmli təqdim ediblər. Mükafatlandırma mərasimində Azərbaycan Jurnalistlər Birliyinin yeni üzvlərinə də vəsiqələr təqdim olunub. Bu il üçün Həsən bəy Zərdabi mükafatına layiq görülənlər arasında Azərbaycanın ilk Turizm və biznes kanalı olan “Qafqaz” TV-nin rəhbəri, Türk altkültürü olan”Çölşü”İB-nin qurucusu və rəhbəri Eltən Qədimbəyli də var. O, region televiziyalarının inkişafına verdiyi töhfələrə, aparıcısı olduğu türk xalqlarını bir araya gətirmək üçün böyük bir addım olan, onun tarixini və ənənələrini dünya miqyasında tanıtmaq baxımından böyük önəm daşıyan “Törənin izində” verilişinə və bu sahədə məhsuldar çalışmalarına görə, Eltən Qədimbəyli bu mükafatla təltif edilib. Eltən Qədimbəyli əməyinə verilən yüksək dəyərə görə Azərbaycan Jurnalistlər Birliyinə təşəkkür edib. O, bu mükafatı həm adı, həm də nüfuzu baxımından jurnalistlər üçün ən vacib mükafatlardan biri hesab edib. Xatırladaq ki, "Zərdabi" mükafatı 1990-cı illərin sonlarında Azərbaycan Jurnalistlər Birliyinin ozamankı sədri, mərhum jurnalist Hacı Hacıyevin təşəbbüsü ilə təsis olunub. Laureatları Azərbaycan Jurnalistlər Birliyi Azərbaycan Jurnalistikası Günü ərəfəsində seçilir. Bu təsisatda məqsəd əsası 1875-ci ildə Həsən bəy Zərdabi tərəfindən qoyulmuş Azərbaycan mətbuatının maarifçilik ənənələrini davam etdirməyə, azad, demokratik və peşəkar mətbuatın formalaşması uğrunda yorulmadan mübarizə aparmağa, obyektiv və məsuliyyətli sözə üstünlük verməyə həvəsləndirməkdir.