ERMƏNİ NAZİR İCTİMAİ TV-YƏ MÜSAHİBƏ VERDİ

Xarici işlər naziri Ararat Mirzoyan sülh müqaviləsinin niyə avqustun 8-də paraflandığı və imzalanmadığı sualına cavab verib. Belə ki, Mirzoyan İctimai Televiziyaya müsahibəsində Ermənistanla Azərbaycan arasında sülhün avqustun 8-də reallığa çevrildiyini vurğulayıb. “Biz demirik ki, saziş imzalanıb, bəli, paraflanıb, tədbirlər olacaq, amma güman edirəm ki, imzalanma və ratifikasiyanın sonrakı mərhələləri hətta çəkisinə görə belə paraflamanı keçə bilməyəcək. Sual olunur niyə paraflanıb, imzalanmayıb? Biz bu sülhü inkişaf etdirməliyik, hələ üzərində işləmək üçün suallar var, həll edilməli çox şey var. Sülh müqaviləsində mahiyyət etibarı ilə bir ölkə üçün yaxşı, digəri üçün isə pis olan heç bir müddəa yoxdur”, - deyə Mirzoyan bildirib. Ermənistan İctimai Televiziyasına verdiyi müsahibəsində Ararat Mirzoyan İrəvan və Bakının Şanxay Əməkdaşlıq Təşkilatına (ŞƏT) tamhüquqlu üzvlük üçün ərizələr təqdim etdiyini və bu təşkilata üzv olmalı olduqlarını da bildirib. “Biz müraciətimizi təqdim etdik, Azərbaycan da müraciətini təqdim etdi. Bizi beynəlxalq tərəfdaşlar kimi qarşıdakı sammitə dəvət ediblər və iştirak edəcəyik. Hesab edirik ki, həm Ermənistan, həm də Azərbaycan bu təşkilatın üzvü ola bilər və olmalıdır”, - deyə o bildirib. Qeyd edək ki, Şanxay Əməkdaşlıq Təşkilatının sammiti 31 avqust – 1 sentyabr tarixlərində Çinin Tyançzin şəhərində keçiriləcək. Sammitdə 20-dən artıq xarici dövlət rəhbəri və 10 beynəlxalq təşkilatın nümayəndəsi iştirak edəcək.