ŞƏHİD SƏNAN QƏHRƏMANOVUN XATİRƏSİ ANILDI

Sənan Qəhrəmanov 19 iyul 2004-cü ildə Quba rayonunun Xucbala kəndində anadan olub. 2011–2022-ci illərdə Quba rayonu, Xucbala kəndi, Zöhrab Əkbərov adına kənd orta məktəbində təhsil alıb. Sənan Qəhrəmanov 19 iyul 2022-ci ildə Səfərbərlik və Hərbi Xidmətə Çağırış üzrə Dövlət Xidmətinin Quba rayon Hərbi Komissarlığı tərəfindən hərbi xidmətə çağırılıb.Azərbaycan Silahlı Qüvvələrinin sıralarında müddətli həqiqi hərbi xidmət edirdi. Azərbaycan ordusunun əsgəri olan Sənan Qəhrəmanov 2023-cü il sentyabrın 19–20-də keçirilən antiterror əməliyyatında iştirak edib.O, 22 sentyabr 2023-cü ildə Xankəndi istiqamətində döyüş tapşırığını yerinə yetirilməsi zamanı qəhrəmancasına şəhid olub. Quba rayonunda dəfn edilib.Şəhid Sənan Qəhrəmanovun doğulub boya-başa çatdığı Quba rayonunun Xucbala kəndində il mərasimi keçirilib. Mərasimdə rayon ictimaiyyəti nümayəndələri, kənd sakinləri, şəhid ailələrinin üzvləri, qazilər və müharibə iştirakçıları iştirak edib. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin Sərəncamına əsasən Sənan Qəhrəmanov ölümündən sonra "Vətən uğrunda" medalı və 3-cü dərəcəli "Vətənə xidmətə görə" ordeni ilə təltif edilib.