ÖZBƏKİSTANDA KÖVKƏB ƏLİYEVANIN BÜSTÜ UCALDILIB

Özbəkistanda Azərbaycan mədəniyyəti və ədəbiyyatı günlərinə start verilib. Habelə Daşkənddəki Heydər Əliyev adına Azərbaycan Mədəniyyət Mərkəzində Azərbaycanın Əməkdar artisti Kövkəb Əliyevanın büstünün açılış mərasimi keçirilib. Mərasimdə Azərbaycan Milli Məclisinin Mədəniyyət Komitəsinin sədri Qənirə Paşayeva, Bakıdan gələn digər qonaqlar, Özbəkistanın ədəbiyyat, mədəniyyət və incəsənət xadimləri, ali məktəblərin professor-müəllim heyəti və jurnalistlər iştirak ediblər. Əvvəlcə Özbəkistanda Azərbaycan mədəniyyəti və ədəbiyyatı günlərində iştirak edən nümayəndə heyəti və tədbir iştirakçıları Azərbaycan Mədəniyyət Mərkəzinin qarşısında ucalan ulu öndər Heydər Əliyevin büstünü və Şəhidlər abidə kompleksini ziyarət ediblər. Sonra tədbir iştirakçılarına Azərbaycanın əməkdar artisti Kaykeb Əliyevanın həyat və yaradıcılığı ilə bağlı hazırlanmış videofilm nümayiş etdirilib. Qeyd edək ki, ötən il Azərbaycanın əməkdar artisti, Özbəkistanın Dostluq orden mükafatçısı Kaykeb Əliyevanın dünyasını dəyişməsi ilə əlaqədar rəhbərlik etdiyi “Azərbaycan qızları” rəqs ansamblına mərhum rəqqasənin adı verilib.