Qazaxıstanda Azərbaycan turizm potensialı təbliğ olunub

Dövlət Turizm Agentliyi və Azərbaycan Turizm Bürosunun təşkilatçılığı ilə Azərbaycan nümayəndə heyəti Almatıda keçirilən Qazaxıstan Beynəlxalq “Turizm və Səyahət” sərgisində iştirak edir.Dövlət Turizm Agentliyindən bildirilib ki, aprelin 19-dək davam edəcək sərgidə ölkəmizdən 11 turizm şirkəti təmsil olunur.

Sərgi çərçivəsində təşkil olunacaq konfrans və dəyirmi masalarda Dövlət Turizm Agentliyi və Azərbaycan Turizm Bürosunun nümayəndələri iştirak edəcəklər. Sərgidə 63 kvadratmetr sahəni əhatə edən və yeni turizm brendinə uyğun dizayn edilmiş stendimizdə videoçarxlar nümayiş etdirilir, turizm potensialının təbliğinə dair çap materialları paylanılır.

Ənənəvi olaraq hər il təşkil olunan “KİTF” sərgisi 2000-ci ildən etibarən keçirilərək Mərkəzi Asiyanın turizm sənayesinin əsas iştirakçılarını bir araya toplayaraq ünsiyyətin qurulması və B2B formatlı görüşlərin keçirilməsində xüsusi əhəmiyyətli platforma rolunu oynayır.