Azərbaycan Turizm Bürosu sentyabr ayından etibarən fotomüsabiqələrə start verir. Azərbaycan Dövlət Turizm Agentliyindən bildirilib ki, 2020-ci ilin avqustunadək hər ay keçiriləcək müsabiqələr müxtəlif mövzuları əhatə edəcək.
“VarYox” mədəniyyət və incəsənət təşkilatının dəstəyi ilə həyata keçirilən müsabiqəyə yalnız Azərbaycanda çəkilən və məzmun cəhətdən ölkəmizin turizm imkanlarını özündə əks etdirən fotolar qəbul olunacaq. Belə ki, yaşı 18-dən yuxarı olan şəxslər https://photocontest.tourismboard.az/ saytından ödənişsiz qeydiyyatdan keçərək ölkəmizin insanını, təbiətini, mədəniyyətini, tarix və ənənələrini əks etdirən maksimum 3 foto ilə müsabiqəyə qoşula biləcəklər. Sinxron_ Kənan Quluzadə / Dövlət Turizm Agentliyinin nümayəndəsi. İştirakçılar fotolarına səs verilməsi üçün müvafiq keçidi sosial şəbəkə hesablarında paylaşa bilərlər. Sonda münsiflər heyəti tərəfindən ən çox səs toplamış 10 foto arasından 5-i seçiləcək və yer sahibləri müxtəlif hədiyyələrlə mükafatlandırılacaqlar. Seçilmiş fotolar Azərbaycanın İnstaqram sosial şəbəkəsindəki rəsmi turizm səhifəsi - “Experience Azerbaijan”-da paylaşılacaq.