1910–cu ilin sonlarında Bakıya Rusiyadan məşhur bir opera müğənnisi qastrola gəlir. Müğənninin şərəfinə verilən ziyafətlərdən birində Bakı milyonçusu Mayılov sənətçi qadından bir də bu şəhərə nə vaxt gələcəyini soruşur. Aktrisa "heç vaxt!" deyə cavab verir.
Milyonçu bu cavabın səbəbi ilə maraqlandıqda müğənni qadın deyir: "Belə böyük şəhərdə oxumağa opera binası yoxdursa, gəlməyimin nə mənası var?" Bu sözlər bakılı milyonçuya bərk təsir edir və elə oradaca qadına söz verir ki, cəmi bir il ərzində opera teatrı üçün gözəl bina tikdirəcək.Gələcək teatr binası üçün Qubernski – Torqovı (indiki Nizami) küçəsində yer alınır və tikinti başlayır. Bu cür təşəbbüsləri həmişə alqışlayan Hacı Zeynalabdin Tağıyev bildirir ki, belə bir binanı bir ilə tikmək qeyri – mümkündür. Mərc gəlirlər ki, əgər opera teatrı vaxtında hazır olsa, onun bütün xərclərini Tağıyev çəkəcək.Beləliklə, cəmi on ay ərzində – 1910 – 1911-ci illərdə memar N. Q. Bayevin layihələşdirdiyi teatr binası hazır olur. Ölkəmizdə ən böyük musiqili teatrı olan Azərbaycan Opera və Balet Teatrı 1920-ci ildən bu günədək bu yaraşıqlı binada fəaliyyət göstərir. 1928-ci ildə teatra M.F.Axundovun adı verilib. Bu sənət məbədi 1959 – cu ildən Akademik Opera və Balet Teatrı adlanır.Bu gün isə Azərbaycan Dövlət Akademik Opera və Balet Teatrı MDB ölkələrinin ən yaxşı opera teatrlarının reytinqində ilk beşliyə daxil edilib. Beləki, Rusiyanın TurStat analitik agentliyi Beynəlxalq Mədəniyyət Günü ərəfəsində tamaşaçılar arasında populyarlıq haqqında məlumatlar, həmçinin teatrların saytlarında və sosial şəbəkələrdə onlayn-translyasiyalar əsasında tərtib etdiyi teatrların reytinqi cədvəlində Azərbaycan Opera və Balet Teatrı Moskvadakı Dövlət Akademik Böyük Teatrı , Minskdəki Belarus Böyük Teatrı, Almatıdakı Abay adına Qazax Dövlət Akademik Opera və Balet Teatrı , Nur-Sultandakı “Astana Opera” teatrından sonra 5-ci yerdədir.