Tarixin ilk müasir olimpiya oyunları 6 aprel 1896-cı ildə Yunanıstanın paytaxtı Afinada başladı. 15 ölkədən 245 idmançının iştirak etdiyi yarış dövrün ən yüksək idman tədbiri idi. 6 aprel 1920-ci ildə Təbrizdə Şeyx Məhəmməd Xiyabaninin başçılığı ilə silahlı üsyan baş verib.
Bu üsyan böyük uğur qazandı, iyunun 24-də Güney Azərbaycan ərazisində Azadistan adlı milli hökumət yaradılıb. Lakin həmin ilin sentyabrında şah qoşunları Təbrizə hücum edərək Azadistan hökumətini qan içində boğdu və Xiyabani isə edam olundu. Şərqdə Ərəstun kimi tanınan qədim yunan filosofu və alimi Aristotel eramızdan əvvəl 384-cü ilin bu günü dünyaya gəlib. Afinada Platonun məktəbində təhsil alan, böyük sərkərdə Makedoniyalı İsgəndərin tərbiyəçisi və müəllimi olan Aristotel özündən sonrakı elmi və fəlsəfi fikrin inkişafına güclü təsir göstərən alim sayılır. O, “Fizika”, “Mexanika”, “Səma haqqında”, “Meteoroloji məsələlər haqqında” və digər əsərlərində təbiət və hərəkət haqqında təsəvvürlərini yazıb. (e.ə.384-322) Bugün tanınmış kinorejissor, kinodramaturq, nasir və professor Tofiq Hüseyn oğlu İsmayılovun doğum günüdü. O, 1939-cu il aprelin 6-da Bakı şəhərində qulluqçu ailəsində anadan olub. Əmək fəaliyyətinə orta məktəbdə oxuyarkən Gənc Tamaçılar Teatrında aktyorluqdan başlayıb. 1960-cı ildən Radio və Televiziya Verilişləri Komitəsində rejissor, 1967-ci ildən "Azərbaycanfilm" kinostudiyasında bədii fılmlərin quruluşçu rejissoru vəzifəsində işləyib. Uzun illər ərzində onlarla bədii filmlərə quruluş verib. O milli dəyərlərə xüsusi diqqət yetirildiyi, tamaşaçıların rəğbətlə qarşıladıqları "Mən nəğmə bəstələyirəm", "Bizim küçənin oğlanları", "Gilas ağacı", "Oxuyur Müslüm Maqomayev", "Əzablı yollar" və digər filmlərin rejissorudur. 1994-cü ildən Türkiyənin Memar Sinan adına Gözəl Sənətlər Universitetinin professoru, eyni zamanda İstanbulun Böyük Şəhər Bələdiyyəsində mədəniyyət işləri üzrə müşaviri vəzifələrində çalışan Tofiq İsmayılov, 25 mart 2016-cı ildə dünyasını dəyişib. 1920-ci ilin 6 apreli Türkiyə beynəlxalq informasiya agentliyi olan Anadolu Ajansın yaradıldığı gündür.